Şam Yeməyi axşam şousu

Bu veriliş, obrazlı desək, böyük bir masa kimidir. Biz masamızın ətrafında dinləyicilərimizin şəxsi etiraflarını məmnuniyyətlə dinləməyə hazırıq. Ən cəsarətli etiraf sahiblərinin yanımızda daim yeri olacaq. Masamızı zarafatla, deyib-gülərək, yaşadığımız və eşitdiyimiz hadisələri şərh edərək, dinləyicilərlə birlikdə böyüdəcəyik.
İşdən sonra deyib-gülərək müxtəlif mövzularda müzakirələr aparırıq, faydalı, əyləncəli məlumatları sizinlə bölüşürük.
Müsabiqəmizdə iştirak edən dinləyicilər isə həm əla əhval-ruhiyyə, həm də pul qazanır.
“Şam yeməyi” radioşousu Prime Time saatlarında iş yorğunluğunu aradan qaldırır.

RUBRİKALAR

Etiraf
Dinləyicilər indiyə qədər heç yerdə, heç kimə etmədikləri bir etiraf səsləndirirlər. Həmin etirafların arsında ən qeyri-adi, ən gözlənilməz olanlar seçilib mükafatlandırılır.

Qanacaqdoldurma məntəqəsi
Masabəyləri “Qanacaqdoldurma məntəqəsi” rubrikasında səsgüləndirici qurğu vasitəsilə etiket qaydaları, mədəni davranışlar haqqında hər kəsə qısa çağırışlar edir, insanlara ictimai yerlərdə necə davranmağın, nələri etməyin, yaxud etməməyin qaydalarını elan edirlər. Çünki başqa cür alınmır.

VVTF (VVhat The Facts)
“VVhat The Facts” (tərcümədə “bu nə faktlardır”) adlanan bu rubrikada gülməli və kuryoz faktlar, məzəli hadisələr, anlaşılmaz sonluqla bitən əhvalatlar səsləndirilir.Bu rubrikanın sonunda isə səslənən xəbərdəki hansısa bir məlumatla bağlı dinləyicilərə sual verilir və bununla da “Assorti” adlı müsabiqə başlayır.

Qeybət

Bu rubrikada elm, texnologiya, təhsil, iqtisadiyyat, şou-biznes və digər mövzularda ən aktual xəbərlər insanlara ən sadə dildə çatdırılacaq. Bu xəbərlər daha çox tənqidi xarakter daşıyır və masabəyləri onların əsasında müəyyən çatışmazlıqlar, nöqsanlar
barədə müzakirə aparırlar. “Qeybət” rubrikası əslində, standart xəbər anlayışının alternativi kimi düşünülüb. Rubrikanın adının “Qeybət” olması isə ironikdir.

Reseptiyyat 

Bu rubrika həftənin yalnız bir günü efirə gedəcək. Müxtəlif ölkələrin mətbəxinə aid olan yeməklərin reseptləri, hazırlanma qaydaları fərqli üslubda – şeir formasında dinləyicilərə çatdırılacaq. Belə ki, bir yeməyin hazırlanma qaydası qafiyələndirilib, poetik şəklə salınaraq şeir kimi səsləndiriləcək. Belə reseptlə yemək bişirməyib, nə edəsən?